AMI Lecteur, il y a enuiron cinq ans que feu Iaques du Puys marchand libraire, voyant qu'il luy restoit fort peu d'exemplaires de ce dictionaire françois-Latin, me donna charge de l'imprimer: mais comme nous estions sur ce propos & deliberation, sont suruenus les troubles de guerre, & en fin la mort dudict du Puys & des siens, qui ont retardé iusques-à present l'entreprise de cest oeuure. Neantmoins d'autant qu'il auoit esté fort bien receu de tous, ie me suis finalement resolu à la requeste de plusieurs personnes qui ont en recommandation la langue françoise & l'aduancement des bonnes lettres, d'y mettre la main, pour le desir que i'ay de seruir au public, & particulierement à la nation Allemande & autres estrangieres, pour lesquelles ce Dictionaire auoit esté principalement dressé. I'ay mis peine de le rendre le plus correct qu'il m'a esté possible, le mettant au reste en forme plus commode & portatiue, mesmes augmenté de plusieurs dictions, sans y rien obmettre de la derniere edition, laquelle M. Nicod conseillier & maistre des requestes de l'hostel du Roy auoit <2> par vne singuliere diligence enrichie de tous les beaux mots & termes concernans le faict de la nauigation, soit en fabrication & equippage de nauires, tant de port que de guerre, soit pour l'esgard des vents & accidents qui suruiennent en mer. En outre y trouuerez ce qui appartient au faict de la venerie & faulconnerie, le tout en tres-bon ordre, ainsi que pourront cognoistre toutes personnes de bon iugement, lesquelles ie prie prendre nostre labeur en bonne part.